ភ្នំពេញៈ អ្នកប្រដាល់ជើងខ្លាំងកម្ពុជាចំនួន ៥ នាក់មាន ឡៅ ចន្ទ្រា, ផាន់ គ្រាន់, ឃីម បូរ៉ា, លាស់ យីន និង ឯម សុធី នឹងត្រូវធ្វើការប្រកួតជាមួយកីឡាករថៃ និងប្រេស៊ីល ក្នុងការប្រកួតប្រដាល់មិត្តភាពអន្ដរជាតិទាំង ២ ព្រឹត្តិការណ៍នៅលើសង្វៀន SEATV នាព្រឹក និងយប់ថ្ងៃអាទិត្យ ខាងមុខនេះ។
សម្រាប់ការប្រកួតក្នុងកម្មវិធី GANZBERG នៅពេលព្រឹក ជើងខ្លាំង ឡៅ ចន្ទ្រាដែលទើបទទួលការខកចិត្ត ព្រោះបានសន្លប់ក្រោមកណ្តាប់ដៃជើងខ្លាំងថៃ Kaophong Chaiphum ក្នុងទឹកទី ២ កាលពីសប្តាហ៍មុននោះ នឹងត្រូវជួបថៃ Phich Nam Ek ដែលធ្លាប់ប្រកួត ៦៨ ដង ឈ្នះ ៥៦ ចាញ់ ១១ និងស្មើ ១ ហើយ លោក ញាន សុធី អ្នកគ្រប់គ្រងកម្មវិធីប្រដាល់នៅ SEATV បានឲ្យដឹងថា Phich Nam Ek មានសមត្ថភាពប្រកួតល្អ ដែលនឹងធ្វើឲ្យលទ្ធផលចាញ់ឬឈ្នះគ្នាក្នុងសភាពតឹងតែងបំផុត។
ចំណែក ឯម សុធី ក្លិបឫទ្ធីពោធិ៍សែនជ័យ ដែលធ្លាប់ប្រកួតបាន ៤៩ ដង ឈ្នះ ៣៨ ចាញ់ ១០ និងស្មើ ១ ដង ហើយធ្លាប់ស្មើកីឡាករថៃ Kham នោះ លើកនេះត្រូវជួបអ្នកប្រយុទ្ធ Phun Savath ក្នុងទម្ងន់ ៥៤ គ.ក្រ។ ថៃម្នាក់នេះ ធ្លាប់ប្រកួតបាន ៦៩ ដង ឈ្នះ ៦៥ លើក និងចាញ់ ៤ ដង ហើយនៅក្នុងប្រវត្តិនេះ គេធ្លាប់ផ្តួល ម៉ន ព្រំម៉ាញ ឲ្យសន្លប់នៅទឹកទី ៤ ប៉ុន្តែបានចាញ់កីឡាករបាង កាយ៉ាក់ ដោយពិន្ទុ។
ជាមួយគ្នានោះដែរកីឡាករ លាស់ យីន ក្លិបតាព្រហ្មមានជ័យ ត្រូវឡើងប្រកួតជាមួយអ្នកប្រដាល់ប្រេស៊ីល K.Ros ក្នុងទម្ងន់ ៦០ គីឡូក្រាម។
លោក ថៃ អ៊ូ អ្នកនាំកីឡាករបរទេសមកប្រកួតនៅ SEATV បាននិយាយថា៖« K.Ros មិនធ្លាប់មកប្រកួតនៅក្នុងស្រុកខ្មែរទេ ដោយគេធ្លាប់ប្រកួតបាន ៣៥ ដង ឈ្នះ ២៤ ចាញ់ ១០ និងស្មើ ១ ដង។ គេមានកម្ពស់ ១,៦៩ ម៉ែត្រ លើសលាស់ យីន តែ ២ សង់ទីម៉ែត្រប៉ុណ្ណោះ ប៉ុន្តែជនជាតិប្រេស៊ីលម្នាក់នេះ មានកណ្តាប់ដៃលឿនរហ័សដូចអ្នកប្រដាល់សកលអាជីពអ៊ីចឹង»។
ដោយឡែក ការប្រកួតក្នុងកម្មវិធីស្រាបៀរ Black Cat នៅពេលយប់វិញនោះ ជើងខ្លាំង មានក្បាច់ប្រយុទ្ធល្អ ឃីម បូរ៉ា របស់ក្លិបរស្មីភូមិគាបខេត្តបន្ទាយមានជ័យ ដែលមានប្រវត្តិប្រកួត ៧៦ ដង ឈ្នះ ៦៤ ចាញ់ ១១ ស្មើ ១ ដងនោះ ត្រូវប៉ះជាមួយកីឡាករថៃ Pha Ravy ដែលមានប្រវត្តិប្រកួត ៥៥ ដង ឈ្នះ ៤៩ និងចាញ់ ៦ ដង ហើយថៃម្នាក់នេះធ្លាប់ឈ្នះ ផល សុផាត ចាញ់ផល សោភ័ណ្ឌ និងឈ្នះ ពុទ្ធឆាយរិទ្ធី។
ចំណែក ផាន់ គ្រាន់ ដែលដំបូងឡើងត្រូវជួប Sing Pheach Noy នោះ ត្រូវបានលោក ថៃ អ៊ូ ប្រាប់ថា ត្រូវដាក់ឲ្យជួបថៃ Chhok Chhai ដែលទើបឈ្នះខ្សែក្រវាត់គោលជល់ នៅសង្វៀនស៊ីធីអិនវិញ ព្រោះ Sing Pheach Noy មានបញ្ហាសុខភាព ហើយការដាក់ Chhok Chhai មកជំនួសនេះត្រូវបានគេមើលឃើញថា ផាន់ គ្រាន់ អាចនឹងចាញ់ ព្រោះនៅក្នុងការប្រកួតដណ្តើមខ្សែក្រវាត់គោជល់នោះ ផាន់ គ្រាន់ បានចាញ់ Chhok Chhai ដាច់ទាំងក្នុងវគ្គជម្រុះ និងវគ្គផ្តាច់ព្រ័ត្រ។
ទោះជាយ៉ាងណា លោក ថៃ អ៊ូ បានអះអាងថា៖«សង្វៀន SEATV គឺខ្ញុំធានាវ៉ៃអស់ពីសមត្ថភាព គ្មានជំនួញភ្នាល់នៅពីក្រោយការប្រកួតនោះទេ ហើយកីឡាករថៃទាំង ៥ នាក់ ដែលយកមកប្រកួតនៅថ្ងៃអាទិត្យនេះ គឺអាចឈ្នះដល់ ៤ នាក់ឯណោះ ព្រោះខ្ញុំបានជម្រើសជើងខ្លាំងៗ និងមានតម្លៃខ្លួនប្រកួតខ្ពស់»៕
0 comments:
Post a Comment